Prizreni me qendër të re grumbulluese të perimeve
E Premte 27 Korrik 2012 18:21
Kultivuesit e pemëve dhe perimeve tashmë kanë në dispozicion edhe një qendër të re grumbulluese në komunën e Prizrenit. Kompania ‘Lirimi Commerce”, me përkrahjen e qeverive të Zvicrës dhe Danimarkës, përmes programit “Promovimi i Hortikulturës në Kosovë”, të cilin është duke e implementuar Helvetas Swiss Intercooperation, ka hapur sot qendrën e re grumbulluese për pemë dhe perime me kapacitete ruajtëse prej mbi 100 tonë.
Ministri i Bujqësisë, Blerand Stavileci tha se këto qendra përveç që iu mundësojnë fermerëve ruajtjen e prodhimeve të tyre edhe në periudha jashtë sezonit, iu mundësojnë atyre edhe lidhjen me zinxhirin përpunues, për çka në të kaluarën ka pasur shumë vështirësi. “Kjo pikë e re grumbulluese është një mundësi e re për fermerët e kësaj komune, por edhe të komunave tjera, që të bashkëpunojnë me kompaninë përfituese. Besoj se projektet e kësaj natyre, që janë duke u realizuar gjithandej Kosovës, po krijojnë mundësi të reja në relacionin prodhues-përpunues”, tha Stavileci, duke shtuar se nga viti i ardhshëm Ministria e Bujqësisë do t’ju ofrojë grante investive edhe kultivuesve të perimeve në fushë të hapur. Kjo përkrahje, sipas ministrit Stavileci, nuk është bërë deri më tani, për shkak që fokusi i deritashëm i Ministrisë ka qenë në prodhimtarinë e perimeve në fushë të mbyllur, për t’ju krijuar mundësi fermerëve që të dalin më herët në treg me perimet e tyre. “Përfitues të granteve dhe subvencioneve të Ministrisë në vlerë prej 1.5 milionë euro janë gjithsej 1 295 fermerë nga komuna e Prizrenit”, deklaroi ministri i Bujqësisë.
Përfaqësuesi i zyrës zvicerane për bashkëpunim në Kosovë, Nils Roseman investimin dhe ngritjen e kësaj qendre grumbulluese e vlerësoi si arritje të mirë, e cila krijon vende të reja pune dhe mundëson rritje më të shpejtë ekonomike. “S’ka dyshim që kjo qendër grumbulluese do të luajë rol kyç në zhvillimin e sektorit privat, me theks të veçantë në industrinë ushqimore të komunës së Prizrenit, rajonit, por edhe më gjerë”, tha Roseman.
Ndërsa, përfaqësuesi i Komunës së Prizrenit, Njazi Kryeziu theksoi se kjo qendër do të krijoj edhe alternativa të tjera për prodhuesit dhe fermerët e kësaj komune.
Vlera e projektit për qendrën e re grumbulluese të kompanisë “Lirimi Commerce” arrin në 140 mijë euro, ndërsa ndërtimi i saj është mbështetur me 65 mijë euro nga qeveritë e Zvicrës dhe Danimarkës.
Komento
Rregullat për komente
- Ju lutemi që të bëni përpjekje që komenti i juaj të përkoj me artikullin në fjalë.
- Gjatë komentimit ju lutemi që ti kushtoni kujdes edhe drejtshkrimit dhe gjuhës letrare.
- Gjithmonë mundohuni që të përdorni një stil më të butë.
- Nëse nuk i përmbaheni rregullave të sipërpërmendura atëherë redaktori i ueb faqes ka të drejtë që të mos e botoj komentin tuaj.
