E Enjte, 23 Maj 2013

I kërkohet ndihmë Portugalisë për njohje të Kosovës

E Mërkurë 16 Maj 2012 13:51

Në kuadër të vizitës zyrtare në Portugali, kryetari i Kuvendit të Republikës së Kosovës, dr. Jakup Krasniqi dhe delegacioni që e shoqëron, është pritur mbrëmë në takime të veçanta nga deputetët e Parlamentit portugez: Teresa Anjihno dhe Joao Serpa Olvia nga Partia Popullore, Antonio Costa Rodrigues nga Partia Social Demokrate, parti këto në bllokun qeveritar, si dhe nga kryetarja e Partisë Socialiste, në opozitë, Maria de Belem Roseria.

Duke shprehur kënaqësinë që patën rastin të njihen me zhvillimet e fundit në Kosovë, parlamentarët portugezë vlerësuan se Kosova është duke ecur në rrugë të drejtë, ndërsa konfirmuan mbështetjen e shtetit të tyre edhe në të ardhmen. Mikpritësit u interesuan për situatën e sigurisë në vendin tonë, marrëdhëniet me Serbinë, si dhe zhvillimet në veri. Ata shprehën interesimin e tyre për thellimin e bashkëpunimit ndërmjet dy parlamenteve.

Kryeparlamentari Krasniqi falënderoi parlamentarët portugez për mikpritjen, për qëndrimin e Portugalisë ndaj Kosovës, mbështetjen ushtarake, si dhe njohjen e pavarësisë që në vitin e parë të shpalljes së saj. Kreu i Kuvendit tha se marrëdhëniet ndërmjet dy vendeve janë miqësore, por shtoi se ato duhet të zhvillohen edhe më tej, veçanërisht në fushën politike, ekonomike e kulturore.

Duke folur për njohjen ndërkombëtare të Kosovës, kryeparlamentari Krasniqi kërkoi nga deputetët portugezë që të ushtrojnë ndikimin e tyre që edhe pesë shtetet anëtare të BE-së, të cilat ende nuk e kanë njohur Kosovën, ta bëjnë këtë, si dhe te shtete të tjera, mike të Portugalisë.

Takimet, të cilat u zhvilluan në frymë të hapur e miqësore, u konsideruan si mundësi për thellimin e mëtejshëm të marrëdhënieve ndërparlamentare  ndërmjet Kosovës dhe Portugalisë.

Delegacioni parlamentar pritet të takohet edhe me personalitete të tjera të larta portugeze.  

SavePrintPdfComments: 0

Komento

500 Karakteriniz kaldi

Rregullat për komente

  1. Ju lutemi që të bëni përpjekje që komenti i juaj të përkoj me artikullin në fjalë.
  2. Gjatë komentimit ju lutemi që ti kushtoni kujdes edhe drejtshkrimit dhe gjuhës letrare.
  3. Gjithmonë mundohuni që të përdorni një stil më të butë.
  4. Nëse nuk i përmbaheni rregullave të sipërpërmendura atëherë redaktori i ueb faqes ka të drejtë që të mos e botoj komentin tuaj.