Feith dhe Petroviq kanë takuar përfaqësuesit e komunitetit boshnjak
E Enjte 21 Qershor 2012 14:15
Përfaqësuesi Civil Ndërkombëtar, Pieter Feith të mërkurën ka inkurajuar përfaqësuesit politik të komunitetit boshnjak të Kosovës që të konsultohen me ministritë përkatëse të Qeverisë së Kosovës për realizimin e synimeve të tyre, që në thelb përmbajnë kërkesat për formimin e komunave të reja, arsim më cilësor dhe përdorimin zyrtar të gjuhës boshnjake.
Shefi i ICO-së ka përkujtuar se fuqizimi i rolit të komunitetit boshnjak brenda shoqërisë kosovare është një proces afatgjatë, që do të vazhdoj edhe pas përfundimit të pavarësisë së mbikëqyrur të Kosovës.
"Kemi diskutuar për decentralizimin dhe dëshirën e komunitetit boshnjak për themelimin e komunave të reja boshnjake. Po ashtu edhe për përdorimin e gjuhës boshnjake dhe për çështjen e edukimit të fëmijëve të këtij komuniteti....Qeveria e Kosovës do të konsideroj hapat që duhen ndërmarrë për fuqizimin e komunitetit boshnjak, dhe ne i dëgjuam argumentet e qarta dhe bindëse për këtë. Por procesi është i gjatë, që do të vazhdoj edhe pas mandatit tim dhe mbylljes së ICO-së. Prandaj inkurajoj përfaqësuesit e komunitetit boshnjak që të konsultohen me ministritë për realizimin e synimeve të tyre", ka thënë Feith, pas debatit të zhvilluar me përfaqësuesit e komunitetit boshnjak në fshatin Reçanë të Prizrenit.
Në këtë takim ai ka qenë i shoqëruar nga zëvendës kryeministri i Kosovës dhe ministri i MAPL-së, Slobodan Petroviq, i cili është zotuar për zgjidhjen e çështjeve që preokupojnë qytetarët e komunitetit boshnjak. Sipas tij, ekzekutivi i Kosovës ka angazhime serioze në drejtim të krijimit të mirëqenies më të mirë për gjthë qytetarët pavarësisht nga përkatësia etnike sikurse edhe ofrimin e shërbimeve më të mira në të gjitha nivelet e qeverisjes. Në këtë drejtim ai ka pranuar se decentralizimi është çështje kyçe e diskutimeve dhe kërkesë prioritare e boshnjakëve të Kosovës.
Ndërsa deputeti i koalicionit të partive boshnjake "VAKAT", Rasim Demiri ka përsëritur qëndrimin se "për komunitetin boshnjak nuk ka ekzistencë në këto troje pa decentralizim".
"Ne e kemi shprehur bindjen tonë se tashmë janë pjekur kushtet për formimin e tri komunave të reja boshnjake, në Reçanë, Vitomiricë dhe Gorë dhe besojmë se me unitetin e spektrit politik boshnjak do t'i realizojmë këto synime", ka thënë Demiri, duke shprehur bindjen se pas këtij takimi boshnjakët janë "një hap më afër formimit të këtyre komunave". /koha/
Komento
Rregullat për komente
- Ju lutemi që të bëni përpjekje që komenti i juaj të përkoj me artikullin në fjalë.
- Gjatë komentimit ju lutemi që ti kushtoni kujdes edhe drejtshkrimit dhe gjuhës letrare.
- Gjithmonë mundohuni që të përdorni një stil më të butë.
- Nëse nuk i përmbaheni rregullave të sipërpërmendura atëherë redaktori i ueb faqes ka të drejtë që të mos e botoj komentin tuaj.
